قصة الحشكبوللي الصغير

من طرف **اسير الحب** الإثنين أبريل 02, 2007 8:26 pm

بسم الله الرحمن الرحيم
السلام عليكم ورحمة الله وبركاته

في يوم من الأيام اللي مطلعتلهاش شمس دخلت واحدة ست مطعم شيك ومحترم وكان معاها شنطة صغيرة فيها علبة صغيرة..

دخلت وقعدت، وندهت على المتر: بس بس بس انت يا متر..

الراجل المتر جِـه وهو راجل محترم ابن ناس كدا زيكو بس الزمن جار عليه واشتغل متر بعد ما عيلته فلست وباع عربيته ومتجوزش البت شلبية اللي كان بيحبها.. المهم مش دا موضوعنا..

قالها: أأمري يا هانم..

قالتله: عايزة واحد سكلوب وواحد سلطة..

قالها: بس كده؟؟

قالتله: لا وكمان عايزة 2 جوز حمام و3 كيلو كباب وفرختين..

الراجل عينيه وِسعت وقال: بس!! هنعمل شغل النهاردة.

وقالها: بس كل دا كتير يا هانم انتي مستنية حد؟

قالتله: لا الكباب والحمام والفراخ للحشكبولِّلي الصغيَّـر

الراجل بص للسقف وقال حشكبولِّلي؟!!

المهم قالها تحت أمرك..

********

الراجل مشى وعمال يفكر مين الحشكبولِّلي الصغير دا أنا مش شايف معاها حد..

جاب الطلبات ومشي و قعد مستني يشوف مين الحشكبولِّلي الصغير دا..

الست قعدت تاكل في السكلوب والسلطة وسابت الباقي لحد ما تخلص

الراجل قال أكيد لسه الحشكبولِّلي موصلش..

المهم الست خلصت وطلعت العلبة الصغيرة وقعدت تدخل الأكل جوا العلبة.. والراجل قاعد يتفرج ودماغه هتشِـطّ

الست تدخل الأكل والأكل بيخلص.. وتدخل الأكل وبردو عمال يخلص.. وهي تدخل الأكل وعمال يخلص..

المهم الأكل خلص..

خدوا بالكو 3 كيلو كباب و 2 جوز حمام وفرختين

الست التفتت عالمتر وقالتله: بس بس بس انت يا متر..

الراجل راحلها بعد ما عينيه احوّلت وقالها: تحت أمرك يا هانم..

قالتله: معلش أصل الحشكبولِّلي الصغير لسه ماشبعش يا ريت تجبلي كمان 3 كيلو كباب و2 جوز حمام وفرختين..

المتر قالها: أنا تحت أمرك يا فندم.. ومشى وهو بيعرج وجاب الأكل وحصل نفس اللي حصل من شوية..

الست تدخل الأكل في العلبة والأكل يخلص..

راحت ندهته تاني وراح الراجل قالها: أكيد الحشكبولِّلي لسه مشبعش أصل أنا عارفه طِـفِـس

قالتله: وانت تعرفه منين دا محدش شافه قبل كدا.. امشي يلاّ هاتلي 2 دستة جاتوه وفرووت سلاد و3 أم علي علشان الحشكبولِّلي الصغير عايز يحلّي..

********

الراجل مشي وهو بيدعي على نفسه ويلعن اليوم اللي اتولد فيه وقال عليّا الطلاق من البت شلبية اللي ماتجوزتهاش ما انتي ماشية قبل ماعرف العلبة دي فيها إيه!!

وجاب الحاجة والست طبعاً قعدت تدخل الأكل العلبة لحد ما الأكل خلص وندهت المتر وقالتله: الحمام فين عايزة أغسل إيدى..

الراجل ورّاها الحمام وقال بــس!! دي فرصة أفتح العلبة واشوف فيها إيه..

المهم مكدِّبش خبر، وأول ما الست راحت الحمام راح جري عالعلبة..

بيفتــــــــــــــــــــــح العلبة.. وبص فيها..

!!!!!!!!!!!!!!!تخيلوا لقى ايه؟!!

لقى

لقى

.....
........
..........

لقى حشكبولِّلي صغيَّر

من طرف **بنوته حكايه** الأربعاء مايو 02, 2007 5:16 pm

ايه ياله الرخامه دي دانا بالى ساعه بقرأ وفى الاخر لقى حشكبوللى صغير Sad

قصة الحشكبوللي الصغير

قصة الحشكبوللي الصغير

رد: قصة الحشكبوللي الصغير